Озари муғом фестивалида ўзбек ижрочиси совриндор
26 Mart 2009 08:23
Озарбайжон пойтахти Бокуда ўтган "Муғом олами" халқаро фестивалида ўзбекистонлик хонанда Юлдуз Турдиева биринчи ўринга сазовор бўлган. 18 мартдан 25 мартгача ўтказилган муғомчилар фестивалида Юлдуз Турдиева озари тилида ижро этган "Қорабоғ шикастаси" муғоми юксак тақдирланган.
Фестивалда Гран-при ва фахрий ёрлиқ билан озарбайжонлик хонанда Тайёр Байрамов мукофотланган.
Фестивалда Афғонистон, Ироқ, Италия, Марокаш, Сурия, Тожикистон, Хитой, Эрон, Ўзбекистон ва Ҳиндистондан муғом ижрочилари иштирок этганлар.
Озари муғоми ЮНЕСКО томонидан инсониятнинг оғзаки ва моддий бўлмаган мероси сифатида эътироф этилган, муғом ўзбек мақом ва достонларига яқин ижод тури ғисобланади.
Бухоро санъат билим юрти ва Тошкент консерваториясида мусиқий таҳсил олган Юлдуз Турдиева ўзбек мумтоз қўшиқларини ижро этади, у озари муғомларини болаликдан ўрганганини айтади.
Би-би-си мухбири билан суҳбатда Юлдуз Турдиева, 1-ўринга сазовор бўлишни ўзи кутмаганини айтган.
326 marta o`qilgan
