Жамиятда қонун устуворлигини таьминлашнинг янгича кўриниши
22 Dekabr 2009 17:13
www.gz.uz - “Ўзбекистон” ҳамда “Ёшлар” телерадиоканаллари орқали эфирга бериб борилаётган тарғибот-ташвиқот кўрсатувларининг навбатдаги сонида Ўзбекистон ”Адолат” социал-демократик партияси аьзолари суд-ҳуқуқ тзими, электрон ҳукуматни шакллантиришнинг йўналишлари билан боғлиқ масалаларни кўтариб чиқди.
Сиёсий кенгаш аьзоси Зуҳра Ботированинг суд-ҳуқуқ тизимининг жамият ҳаётидаги аҳамияти нечоғли муҳим эканлиги борасидаги фикрларини келтириб ўтамиз. “ Жамиятда қонун устуворлигига эришиш, фуқароларнинг қонун олдида тенглиги, суд-ҳуқуқ соҳасидаги ислоҳотларнинг изчил давом эттирилиши билан боғлиқ бўлган мақсад ва интилишларимиз кўпчиликнинг эътиборини қозонмоқда. Суд-ҳуқуқ соҳаси ислоҳотларининг изчил давом эттирилиши билан бир қаторда албатта, биз суд-ҳуқуқ соҳаси вакилларининг масъулиятини ошириш масаласига ҳам алоҳида эътибор қаратганмиз. Суд ҳокимиятининг мустаҳкамланиши, прокуратура ва адвокатуранинг ваколатларининг тенглаштирилиши айниқса, жойларда сайловчиларимизнинг эътиборини тортмоқда. Давлат бошқаруви албатта, ўз фаолиятида қонунийликка асосланади. Бугунги кунда Ўзбекистонда яратилаётган барча қонунлар ушбу ишни амалга оширишда тўла ҳуқуқий асос бўла олади”.
Фуқароларнинг турли масалаларга оид мурожаатларини қисқа муддатларда ҳал этилиши ҳам жамиятда қонун устуворлигини таьминлашнинг белгисидир. Кўрсатув иштирокчилари бугунги глобаллашув жараёнида фуқароларнинг мурожаатларини қабул қилиш ва ҳал этиш чоралари ҳақида ўз фикрларини билдириб ўтди. Хусусан, Адолат СДПнинг сайловолди дастурида электрон ҳукуматни шакллантириш таклифи ҳам ўрин олган. Электрон ҳукуматнинг ташкил этилиши фуқароларнинг хоҳлаган ташкилот, вазирликлар ёки мансабдор шахсларга мурожаат этиш ҳуқуқларини тўла амалга оширади. Шу билан бирга мурожаатга жавоб олиш муддатини ҳам қисқартиради.
Партия фаолларининг фикрларига кўра, сайловолди дастуридаги электрон ҳукуматни янада ривожлантириш ғояси ёшлар томонидан қизғин қўллаб-қуватланаётган экан. Бу бугунги замонавий жамият учун жуда ҳам муҳим институт ҳисобланади. Бу орқали бир неча мақсадларни амалга ошириш мумкин. Бир томондан бу ҳокимият структуралари билан халқ ўртасидаги ахборот алмашинувини яхшиласа, иккинчи томондан, давлат ҳокимияти институтлари фаолияти устидан жамоатчилик назоратини кучайтиришга ҳам хизмат қилади.
Эслатиб ўтамиз, “Адолат” социал-демократик партиясига 1995 йилда асос солинган. Бугунги кунда партия аьзоларининг сони 75 мингдан зиёдни ташкил этади. Ўзбекистон Республикаси Олий Мажлис Қонунчилик палатасидаги фракцияси 10 нафар депутатдан иборат.
78 marta o`qilgan
